చట్టపరమైన విముక్తితో పాటు సామాజిక, ఆర్థిక విముక్తి సాధించాలి

సంచార–విముక్త జాతుల సమస్యల పరిష్కారానికి ప్రత్యేక చర్యలు చేపట్టాలి: వరికుప్పల సుధాకర్

రంగారెడ్డి, ఆగస్టు 31:
సంచార–విముక్త జాతులకు చట్టపరంగా విముక్తి లభించినప్పటికీ, సామాజికంగా, ఆర్థికంగా, విద్యాపరంగా సంపూర్ణ విముక్తి సాధించే వరకు పోరాటం కొనసాగాల్సిన అవసరం ఉందని వడ్డెర సంగం రాష్ట్ర నాయకులు, టీపీసీసీ స్టేట్ అబ్సర్వర్ (ఓబీసీ డిపార్ట్మెంట్) వరికుప్పల సుధాకర్ అన్నారు.

సంచార–విముక్త జాతుల 75వ విముక్తి దినోత్సవం సందర్భంగా రంగారెడ్డి జిల్లా కార్యాలయంలో తెలంగాణ రాష్ట్ర ప్రభుత్వం ఆధ్వర్యంలో నిర్వహించిన కార్యక్రమంలో ఆయన పాల్గొని సంచార–విముక్త జాతుల సమస్యలు, హక్కులు, ప్రభుత్వం చేపట్టాల్సిన చర్యలపై తన అభిప్రాయాలను వెల్లడించారు. ఈ కార్యక్రమాన్ని అధికారికంగా నిర్వహించిన రాష్ట్ర ప్రభుత్వానికి ఆయన ప్రత్యేక ధన్యవాదాలు తెలిపారు.

ఈ సందర్భంగా సుధాకర్ మాట్లాడుతూ.. సంచార–విముక్త జాతుల విముక్తి దినోత్సవం కేవలం ఒక సాధారణ కార్యక్రమం కాదని, ఎన్నో తరాలుగా అవమానం, వివక్ష, పేదరికాన్ని ఎదుర్కొన్న సమాజాల చరిత్రను గుర్తు చేసుకునే చారిత్రాత్మక రోజని అన్నారు. బ్రిటిష్ పాలనలో 1871లో కొన్ని సంచార జాతులను ‘నేరస్థ జాతులు’గా ముద్రవేసి, వారి స్వేచ్ఛ, సంచార జీవన విధానం, ఆత్మగౌరవాన్ని దెబ్బతీశారని గుర్తుచేశారు. పోలీసుల నిఘా, అనుమానాలు, వేధింపులు వారి జీవితాల్లో భాగమయ్యాయని తెలిపారు.

స్వాతంత్ర్యం అనంతరం 1952 ఆగస్టు 31న సంబంధిత చట్టాలను రద్దు చేసి వారిని విముక్తులుగా ప్రకటించారని, అయితే చట్టపరంగా విముక్తి లభించినంత మాత్రాన వారి జీవితాల్లో సంపూర్ణ విముక్తి వచ్చినట్లు కాదని సుధాకర్ పేర్కొన్నారు.

ఇప్పటికీ అనేక సంచార–విముక్త జాతుల కుటుంబాలకు సొంత ఇళ్లు, ఇంటి స్థలాలు, భూములు లేకపోవడంతో పాటు పిల్లలకు నాణ్యమైన విద్య, స్థిరమైన ఉపాధి అవకాశాలు అందడం లేదన్నారు. కుల, నివాస ధృవీకరణ పత్రాలు వంటి ప్రాథమిక పత్రాలు లేకపోవడం వల్ల అనేక కుటుంబాలు ప్రభుత్వ సంక్షేమ పథకాలకు దూరమవుతున్నాయని ఆవేదన వ్యక్తం చేశారు.

ప్రభుత్వానికి ముఖ్య డిమాండ్లు

సంచార–విముక్త జాతుల అభివృద్ధి కోసం ప్రభుత్వం ప్రత్యేక చర్యలు చేపట్టాలని సుధాకర్ కోరారు.

* సంచార–విముక్త జాతుల కుటుంబాలపై సమగ్ర సర్వే నిర్వహించి, వారి జనాభా, ఆర్థిక, విద్యా, సామాజిక పరిస్థితులపై పూర్తి స్థాయి డేటా సేకరించాలి.
* ప్రతి కుటుంబానికి ఇంటి స్థలం, సొంత ఇల్లు, నివాస ధృవీకరణ పత్రం, కుల ధృవీకరణ పత్రం అందేలా ప్రత్యేక డ్రైవ్ నిర్వహించాలి.
* పిల్లలకు ప్రత్యేక విద్యా సౌకర్యాలు, హాస్టళ్లు, స్కాలర్‌షిప్‌లు, నైపుణ్యాభివృద్ధి కార్యక్రమాలు, ఉద్యోగ అవకాశాలు కల్పించాలి.
* వారి సంప్రదాయ వృత్తులు, కళలు, నైపుణ్యాలను కాపాడుతూ స్వయం ఉపాధి కోసం ఆర్థిక సహాయం, రుణాలు, మార్కెటింగ్ సదుపాయాలు కల్పించాలి.
* ప్రభుత్వ సంక్షేమ పథకాలు అర్హులైన ప్రతి కుటుంబానికి చేరేలా ప్రతి జిల్లాలో ప్రత్యేక వ్యవస్థను మరింత బలోపేతం చేయాలి.

కేంద్ర ప్రభుత్వం కూడా DNT/NT/SNT వర్గాల సంక్షేమం కోసం పలు చర్యలు చేపట్టిందని, 2019లో Development and Welfare Board for Denotified, Nomadic and Semi-Nomadic Communities (DWBDNC) ఏర్పాటు చేసిన విషయాన్ని ఆయన గుర్తుచేశారు.

“చట్టం 1952లో వారిని విముక్తులను చేసింది. ఇక ప్రభుత్వాలు వారి జీవితాలను పేదరికం, నిరక్షరాస్యత, నిరుద్యోగం, వివక్ష నుంచి విముక్తి చేయాలి. అదే నిజమైన విముక్తి” అని సుధాకర్ అన్నారు.

సంచార–విముక్త జాతుల హక్కులు, ఆత్మగౌరవం, వారి పిల్లల భవిష్యత్తు, సామాజిక న్యాయం కోసం అందరూ ఐక్యంగా నిలబడాలని పిలుపునిచ్చారు. విముక్తి దినోత్సవం సందర్భంగా సంచార–విముక్త జాతుల సోదర సోదరీమణులకు ఆయన హృదయపూర్వక శుభాకాంక్షలు తెలిపారు.

ఈ కార్యక్రమంలో జిల్లా వెనుకబడిన తరగతుల అభివృద్ధి శాఖ అధికారి బి. కేశురాం, సహాయ అధికారి పి. రామేష్, తెలంగాణ రాష్ట్ర సంచార జాతుల/కులాల రాష్ట్ర నాయకులు కుమార్ మహేంద్ర, నరేందర్, రమేష్, డేరంగుల కృష్ణ, వరికుప్పల సుధాకర్తో పాటు 52 సంచార కుల సంఘాల నాయకులు, ప్రతినిధులు, అధికారులు తదితరులు పాల్గొన్నారు.