బీఆర్‌ఆర్ ఫౌండేషన్ ఆధ్వర్యంలో హెల్మెట్ల పంపిణీ – ట్రాఫిక్ నిబంధనలు, మాదకద్రవ్యాల నిర్మూలనపై అవగాహన

బీఆర్‌ఆర్ ఫౌండేషన్ ఆధ్వర్యంలో హెల్మెట్ల పంపిణీ – ట్రాఫిక్ నిబంధనలు, మాదకద్రవ్యాల నిర్మూలనపై అవగాహన

ఇబ్రహీంపట్నం: రోడ్డు ప్రమాదాల నివారణతో పాటు మాదకద్రవ్యాల రహిత సమాజ నిర్మాణమే లక్ష్యంగా బీఆర్‌ఆర్ ఫౌండేషన్ ఆధ్వర్యంలో ఇబ్రహీంపట్నం నియోజకవర్గంలో ద్విచక్ర వాహనదారులకు ఉచిత హెల్మెట్ల పంపిణీ కార్యక్రమం ఘనంగా నిర్వహించారు. ఈ సందర్భంగా ట్రాఫిక్ నిబంధనలు, రహదారి భద్రత, మాదకద్రవ్యాల దుష్ప్రభావాలపై విస్తృత అవగాహన కల్పించారు.

ఈ కార్యక్రమంలో బీఆర్‌ఆర్ ఫౌండేషన్ చైర్మన్ బూడిద రామ్ రెడ్డి మాట్లాడుతూ, హెల్మెట్ అనేది కేవలం చట్టం కోసం ధరించేది కాదని, ప్రతి కుటుంబానికి రక్షణ కవచమని అన్నారు. ద్విచక్ర వాహనదారులు తప్పనిసరిగా నాణ్యమైన హెల్మెట్ ధరించి ట్రాఫిక్ నిబంధనలను పాటించాలని సూచించారు. అతివేగం, నిర్లక్ష్యపు డ్రైవింగ్, సెల్‌ఫోన్ మాట్లాడుతూ వాహనం నడపడం, మద్యం లేదా మాదకద్రవ్యాల ప్రభావంలో డ్రైవింగ్ చేయడం వంటి చర్యలు ప్రమాదాలకు ప్రధాన కారణాలని పేర్కొన్నారు.

ముఖ్య అతిథిగా పాల్గొన్న ఫ్యూచర్ సిటీ కమిషనర్ శివ ఉపాధ్యాయ మాట్లాడుతూ, రహదారి భద్రత ప్రతి ఒక్కరి బాధ్యత అని అన్నారు. ట్రాఫిక్ సిగ్నల్స్‌ను పాటించడం, నిర్ణీత వేగ పరిమితిలోనే వాహనాలు నడపడం, హెల్మెట్, సీట్‌బెల్ట్ వినియోగాన్ని తప్పనిసరిగా అలవర్చుకోవాలని సూచించారు. చిన్న నిర్లక్ష్యం కూడా ప్రాణాంతక ప్రమాదాలకు దారితీస్తుందని హెచ్చరించారు.

అనంతరం మాదకద్రవ్యాల వినియోగం వల్ల యువత భవిష్యత్తు దెబ్బతింటుందని, కుటుంబాలు, సమాజంపై తీవ్ర ప్రభావం పడుతుందని వక్తలు వివరించారు. యువత చెడు అలవాట్లకు దూరంగా ఉండి విద్య, ఉపాధి, క్రీడలు, సామాజిక సేవ వంటి సానుకూల మార్గాల్లో ముందుకు సాగాలని పిలుపునిచ్చారు.

కార్యక్రమంలో ట్రాఫిక్ పోలీసు అధికారులు రహదారి భద్రతా నిబంధనలు, హెల్మెట్ ధరించడం వల్ల కలిగే ప్రయోజనాలు, ట్రాఫిక్ ఉల్లంఘనలకు సంబంధించిన చట్టపరమైన చర్యలపై ప్రజలకు అవగాహన కల్పించారు. హెల్మెట్ల పంపిణీతో పాటు ట్రాఫిక్ రూల్స్, మాదకద్రవ్యాల నిర్మూలనపై ప్రతిజ్ఞ చేయించారు.

ఈ కార్యక్రమంలో ట్రాఫిక్ పోలీసు సిబ్బంది, బీఆర్‌ఆర్ ఫౌండేషన్ ప్రతినిధులు, యువత, ద్విచక్ర వాహనదారులు, స్థానిక ప్రజలు పెద్ద సంఖ్యలో పాల్గొన్నారు.